打麻雀

今早見blog友仔寫玩啤牌，我又談談言大師的打麻雀。

前天，言大師跟河媽說他在學校跟同學仔打麻雀。河媽聽了，打個突，心想：唔係化？

河媽：吓﹗你唔好係學校講「打麻雀」呀，老師聽到可能會罰你呀﹗

言：點解？

haha.... 點解呢？河媽支吾以對：唔.... 咁「打麻雀」賭博嘛，唔好呀﹗(當然河媽明白，無用錢不算賭博，但點都要找個理由給他嘛﹗)

言：唔會呀﹗陳老師仲問可唔可以同佢一齊玩？

噢﹗真開放﹗原來學校是如此開放的。我這位家長真的太膚淺了﹗




究竟大師們如何在校「打麻雀」呢？

答案：用層層疊。

雖然道具是假，但內容很真的。他們什麼「天糊」、「地糊」、「對對糊」、「槓」。好pro呀﹗仲知四個同色先「槓」，有對「眼」先食糊。「天糊」就是一開始就食，「地糊」就打幾下先食。

聽聽下，河媽有少少心虛。之前河爸河媽試過在朋友家打過麻雀嘛﹗

於是，試探一下大師，問：邊個教你打麻雀呀？你媽媽成日打麻雀咩？

言：係呀﹗我自己識呀﹗媽媽好少打，爺爺就成日打，佢成日出去打麻雀。

haha.... 兇手不是河媽，放心很多﹗



其實，新年時，嫲嫲家有打下麻雀仔的。但更重要的是，電視﹗

過年時，電視重播「賭神」、「賭聖」、「賭俠」，大師追晒，之後仲要去戲院睇「賭城風雲」。傻了﹗



唉﹗這幾天雨天小息，要留在課室，他們就打了幾天麻雀。

有少少擔心﹗怕其他家長投訴呀﹗

想想，人家那些「小白兔」，返到屋企同爸媽講：打麻將、天糊、地糊.....。人家家長問下：邊個教呀？你同邊個玩呀？咁.... 係未大件事呢？