問你火唔火？

2月19日

言大師放學回家，河媽正為他準備雞脾仔作下午茶。河媽叫他先沖涼，沖完有得食﹗

未幾，言大師進入廚房，將校服放進污衣籃，大大聲：媽媽，我沖完涼了﹗

河媽讚他：呀﹗今日咁快，勁喎﹗

言大師：好出奇咩？

河媽：其實沖涼可以好快的，但你次次都好耐。今日咁快，以你嚟講，真係好出奇﹗勁﹗

之後，河媽出了廳。呀﹗點解言大師個頭乾的？

河媽：你無洗頭呀？

言：有呀﹗

河媽：吓﹗乾喎﹗乾得咁快？你有無洗頭呀？

言：有。真係有﹗

河媽：你有無吹頭呀？

言：無。

河媽：無吹頭，果頭咁快乾？你唔好呃我呀﹗你有無洗頭？

言：真係有呀﹗我無呃你﹗

河媽：媽媽講過，唔准講大話的，誠實好重要。你答我，你有無洗頭？

言：有﹗

天呀﹗佢以為自己是絕頂聰明；還是覺得媽媽是零智慧呢？

之後，河媽想想，走進浴室看看。

零蒸氣囉﹗

浴缸，乾的﹗

地毯原封不動﹗

不單無洗頭，涼都無沖﹗

火火媽好火﹗

罰 

唉﹗連沖涼都可以呃﹗激氣﹗

老老實實，品德好重要嘛﹗講大話，會講上隱的。

唉﹗諗諗下，這個古惑仔，都唔知呃過我這個純品媽幾多次？

唉﹗好傷心﹗被人欺騙感情﹗

之後盤問騙子為何講大話，騙子說：唔想媽媽知。

問：點解呃媽媽話自己沖咗涼？

騙子答：唔想沖涼。

是夜，嬲了騙子。

就算騙子美言，要來個抱抱，河媽亦冷言：諗下先。

要做一個成功的騙子，要懂得心計。

這方面，大師很強。

在河媽沖涼時，言大師剪了一大堆「免嬲COUPON」

這是河家的小玩意。它是言大師給媽媽的獎勵計劃，當他覺得媽媽做得好，就會給印仔，儲滿可得一張COUPON。當言大師發脾四時，媽媽就可以用一張COUPON，要他唔嬲，笑番﹗

很溫馨嘛﹗是的，言大師可以冧爆你的，但他亦有好大能力，將你引爆、自焚﹗



晚上，再訓示大師。唉﹗能言善辯的小朋友，很容易為自己做錯事找藉口。他說：我不想沖涼，因為我怕自己一個人，我想快些出來找你﹗其實我都唔想自己一個人睏，我怕自己一個、我怕黑﹗

很心動的說話嘛﹗他真有能力，他可以將固有的事實，與他的犯錯關聯。似曾相識嘛？這該算是「語言偽術」嘛﹗

不是河媽不信他，但事實是，自己沖涼已發生了幾年。在自己家中浴室沖涼，亞媽都在家中，有多獨單呀？他開心時，可以在浴室唱歌呢﹗只是那刻，他不想沖涼，諸事不順呢﹗



說真，哪有人未曾講過大話呢？扮已沖涼，這般大話，心平氣和後，真覺得，堅好笑﹗

某程度，講大話可以是善良的語言，但用家要先自我掌握呢﹗未有這能力時，河媽要做的，就是嚴打﹗

嘿﹗好彩被精明河媽發現，雖然他可能已不是第一次，但總叫發現了﹗

亞Q的河媽，無可奈可地，都覺得這是一件好事﹗

加油﹗